Gall technoleg ymddangos yn frawychus, ond mae’n allweddol a gall effeithio'n gadarnhaol ar eich busnes a'ch helpu i aros ar y blaen mewn marchnad gystadleuol.

Mae Clinigau Digidol PACE Cymru wedi'u cynllunio i chwalu'r rhwystrau hyn a'ch helpu i ddefnyddio offer digidol priodol mewn ffordd hygyrch.

Dywedodd Ray D'Arcy, Rheolwr Gyfarwyddwr Tregroes Waffles yn Llandysul:

"Rwy'n gyffrous am dair prif agwedd ar ein cydweithrediad â thîm PACE Cymru ym Mhrifysgol Cymru y Drindod Dewi Sant. Yn gyntaf, eu hasesiad o'n gweithrediadau becws a'n prosesau peiriannau fel arbenigwyr. Yn ail, eu gwybodaeth am y defnydd o ynni a sut y gallwn drosglwyddo ynni yn fwy effeithlon er budd y busnes. Yn drydydd, archwilio sut y gall arloesi effeithio ar ein busnes, ein helpu i greu cynhyrchion newydd, a hyd yn oed nwyddau. Mae eu cyfuniad o brofiad yn y diwydiant ac arbenigedd ymchwil yn amhrisiadwy, ac rydym yn gyffrous am yr hyn y gallant ei gynnig i'n busnes a busnesau tebyg yn yr ardal."

Pam y gallai’r Clinig Digidol fod yn ddefnyddiol?

Mae diffyg hyder a diffyg ymwneud â thechnolegau newydd yn aml yn atal busnesau rhag cymryd y cam cyntaf hwnnw. Gall pryderon ynghylch tarfu, costau ac amser ei gwneud hi'n hawdd oedi cyn mynd ati i’w mabwysiadu. Nod Clinigau Digidol PACE Cymru yw symleiddio technoleg, gan arddangos offer ymarferol sy'n hygyrch, yn effeithiol ac wedi'u teilwra i anghenion eich diwydiant.

Enghreifftiau o dechnoleg y byddwch yn ei gweld a'u heffaith:

• Awtomeiddio a Roboteg - Awtomeiddio tasgau fel didoli, pecynnu a rheoli ansawdd. Gall y dechnoleg hon gynyddu cyflymder cynhyrchu, lleihau gwallau, a lleihau costau llafur, neu lenwi bylchau pan mae’n anodd cael staff. Byddwch yn gweld sut y gall roboteg wella effeithlonrwydd heb amharu ar eich gweithrediadau fel y maent ar hyn o bryd.
• Cynnal a Chadw Rhagfynegol gyda Synwyryddion Rhyngrwyd Pethau (IoT) - Gan ddefnyddio synwyryddion a dyfeisiau IoT, byddwch chi'n dysgu sut i fonitro iechyd peiriannau ac atal amser segur annisgwyl. Gall y synwyryddion hyn eich rhybuddio am broblemau posibl, gan ganiatáu trefnu gwaith cynnal a chadw yn rhagweithiol. Mae hyn nid yn unig yn ymestyn oes eich offer ond hefyd yn helpu i osgoi gorfod rhoi’r gorau i gynhyrchu am gyfnod, sy’n gostus.
• Monitro Amser Real - Darganfyddwch sut y gall synwyryddion digidol olrhain paramedrau cynhyrchu pwysig fel tymheredd, pwysedd a lleithder, gan sicrhau bod eich cynhyrchion yn cwrdd â safonau ansawdd yn gyson. Mae hyn yn golygu llai o adalw, gwell ansawdd cynnyrch, a mwy o ymddiriedaeth ymhlith cwsmeriaid.
• Cadwyn flociau ar gyfer olrhain - Mae olrhain yn allweddol o ran diogelwch bwyd. Mae technoleg cadwyn flociau yn darparu cofnod na ellir ei newid o bob cam yn eich cadwyn gyflenwi, gan wella tryloywder a galluogi gweithredu cyflym wrth adalw neu wrth gynnal gwiriadau ansawdd.
• Realiti Estynedig (AR) ar gyfer Glanhau a Chynnal a Chadw - Gyda dyfeisiau sydd ag AR wedi’i alluogi, gall eich tîm ddilyn canllawiau cam wrth gam ar gyfer glanhau a chynnal a chadw heb fod angen eu dwylo i ddal llawlyfrau. Mae hyn yn gwella cywirdeb, yn sicrhau bod y gweithdrefnau cywir yn cael eu dilyn, ac yn cynyddu diogelwch, gan leihau amser segur a gwallau dynol.

Hefyd yn y sesiwn hon, bydd Gareth Evans, Pennaeth Canolfan Arloesi Adeiladwaith Cymru (CWIC) a'i dîm yn cyflwyno technolegau trawsnewidiol i'ch helpu i reoli eich adeiladwaith a'ch ystad yn fwy effeithiol. Enghraifft allweddol yw Technoleg Gefeilliaid Digidol a BIM sy'n creu replica rhithwir o'ch adeilad.

Mae'r model digidol hwn yn eich helpu i fonitro perfformiad amser real, olrhain y defnydd o ynni, a chanfod traul a gwisgo cyn iddo ddod yn fater costus. Trwy nodi anghenion cynnal a chadw ataliol yn gynnar a gwneud y gorau o lif gweithrediadau, mae Gefeilliaid Digidol yn helpu i ymestyn hyd oes eich asedau, lleihau costau ynni, a gwella effeithlonrwydd cyffredinol adeiladau - gan ganiatáu ichi wneud penderfyniadau rhagweithiol, wedi'u gyrru gan ddata sy'n amddiffyn eich ystad a'ch cyllideb. Dyma un o'r offer arloesol y bydd Gareth a'i dîm yn eu trafod, a’r cyfan wedi'i gynllunio i gefnogi rheoli asedau mewn ffordd fwy doeth a datblygu nodau cynaliadwyedd ar draws eich ystad.

A byddwch yn cwrdd â Spot y Ci Robot!

Bydd mynd i Glinig Digidol PACE Cymru yn eich helpu i:

• Fagu profiad ymarferol o’r dechnoleg ddiweddaraf.
• Gweld arddangosiadau ac enghreifftiau sy'n uniongyrchol berthnasol i gynhyrchu Bwyd a Diod.
• Gofyn cwestiynau i arbenigwyr a chael atebion sy'n mynd i'r afael â'ch pryderon penodol.
• Deall manteision go iawn, megis cynyddu cyflymder cynhyrchu, cysondeb ac arbedion cost.
• Trafod heriau a dysgu strategaethau i'w goresgyn.
• Bwyta cinio blasus!

Manylion y digwyddiad:

Dydd Mercher, 27 Tachwedd

10am – 11am: Sesiwn 1 Bwyd a Diod (galw heibio) 

11am – 12pm: Sesiwn 2 Bwyd a Diod (galw heibio)   

12:30pm – 1:30pm: Cinio Dewisol 

Lleoliad: Canolfan Bwyd Cymru, Horeb, Llandysul SA44 4JG 

Cofrestrwch yma: Cofrestrwch drwy Eventbrite ar gyfer Canolfan Bwyd Cymru

Mae yna hefyd Glinig Digidol Amgylchedd Adeiledig yn Aberystwyth y diwrnod cynt:

Dydd Mawrth, 26 Tachwedd

11am – 12pm: Sesiwn yr Amgylchedd Adeiledig (galw heibio)

12:30pm – 1:30pm: Cinio Dewisol 

Lleoliad: Gwesty Llety Parc Aberystwyth, Ffordd Parc y Llyn, Llanbadarn Fawr, Aberystwyth SY23 3TL 

Cofrestrwch yma:

Cofrestrwch drwy Eventbrite ar gyfer Gwesty Llety Parc Aberystwyth

Gwyliwch Glinigau Digidol ar waith:

Clip YouTube 1
Clip YouTube 2

Cwestiynau?

E-bostiwch MADE@uwtsd.ac.uk

Mae'r prosiect hwn yn rhan o fenter Prifysgol Cymru Y Drindod Dewi Sant (PCYDDS), a gyflwynir mewn cydweithrediad â Chyngor Sir Ceredigion. Mae'n cael ei ariannu gan Lywodraeth y DU drwy Gronfa Ffyniant Gyffredin y DU.